𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-10 𝒇𝒆𝒃𝒓𝒐𝒂𝒓𝒚 2026]

Hotanterahina ao amin’ny Palais des Nations, any Genève amin’ity herinandro ity ny fihaonana iraisampirenena ho an’ny sehatry ny cacao 2026, ho fanomezan-danja ny toeran’izany vokatra izany eo amin’ny sehatry ny toekarena iraisampirenena. Hamondrona firenena mpikambana ao amin’ny UNCTAD sy rafitra maro ity andiany ity, ao anatin’ny tanjona fampiroboroboana ny fitsipika iraisampirenena, ny varotra ara-drariny ary ny fampandrosoana maharitra amin’ny sehatry ny cacao.

Efa niainga hihazo any an-toerana ny Praiminisitra, Lehiben’ny Governemanta, Rajaonarivelo Herintsalama Andriamasy, iraky ny Filohan’ny fanavaozana ny Repoblika hitarika ny delegasiaona hanatrika izany. Mandritra ny fivahinianana any an-toerana dia maro ireo tomponandraikitra ambony hifanakalo hevitra sy hihaona amin’ny delegasiaona malagasy, ka isan’izany ny avy eo anivon’ny CNUCED (Convention des Nations Unies sur le Commerce et le Développement), ny OMC (Organisation Mondiale du Commerce), ary ny ITC (Centre du Commerce International).

Hamerina ny tanjaka ara-toekarena eto Madagasikara no tanjon’ny Fitondram-panjakana, mba ahafahan’ny vahoaka miaina ao anatin’ny fitoniana ara-pihariana sy ara-tsôsialy. Araka izany dia hanamafy ny fahatokisan’ny mpampiasa vola malagasy sy vahiny ary ny mpiara-miombon’antoka amin’ny sehatra ara-toekarena izao fandraisana anjara lehibe ataon’i Madagasikara izao. Hanatsara ny rojom-pamatsiana sy ny fanondranana ihany koa, ho fanamafisana ny fitomboana ara-toekarena sy hampiakarana ny fidiram-bola ho an’ny rehetra amin’ny alalan’ny fahaiza-mitantana ny vokatra vokarina eto amintsika.

𝐍𝐲 𝐒𝐞𝐫𝐚𝐬𝐞𝐫𝐚