Traboina tao amin’ny Boriborintany voalohany indray no notsidihan’ny solontena avy amin’ny Fitondram-panjakana notarihin’ny Minisi-panjakana, Me Hanitra Razafimanantsoa niaraka tamin’ny Minisitry ny Filaminam-bahoaka, ny Minisitry ny Fambolena sy Fiompina ary ny Minisitry ny Haitao Ara-kajy Mirindra ny Paositra sy ny Fifandraisan-davitra.

Toy ny nataon’ny Filoham-panjakana sy ireo Mpanolontsaina Avo izay any amin’ny Faritr’i Boeny, ary ny Praiminisitra sy ireo Ministra sasany any amin’ny Faritra Atsinanana, dia nitondra ny teny fampaherezana sy nampiseho fiaraha-mientana ihany koa izy ireo ho an’ireo mponina izay voatery niala ny tranony noho ny fiakaran’ny rano vokatry ny rivo-doza Fytia.

Manoloana ny fitarainan’ny mponina teny antoerana amin’ny fiverimberenan’ny voina dia nilaza ny Minisi-panjakana 𝐌𝐞 𝐇𝐚𝐧𝐢𝐭𝐫𝐚 𝐑𝐚𝐳𝐚𝐟𝐢𝐦𝐚𝐧𝐚𝐧𝐭𝐬𝐨𝐚, fa henon’ny fitondram-panjakana ny taraina sy ny marary ny vahoaka ka hojerena ny vahaolana maharitra hialana amin’izany ary tafiditra anatin’ny fanavaozana ihany koa izany.

Nanentana ny rehetra hikajy ny fahadiovana ihany koa izy hisorohana ny fiparitahan’ny aretina. « Isika rehetra no mila mihavao, fiaraha-mientana sy fifanomezan-tànana no atao » hoy izy tamin’izany.

Notolorana fanomezana toy ny vary, menaka sy voamaina izy ireo.

Ho an’ny boriborintany voalohany, ankoatra ny teo amin’ny ANS Ampefiloha dia misy toerana fandraisana tra-boina ihany koa ny ao amin’ny Tanimenabe APIPA Ampefiloha, Gymnase Mahamasina, ny Tranompokonolona Madera Namontana izay ahitana traboina maherin’ny arivo.