2 𝙵𝚎𝚋𝚛𝚘𝚊𝚛𝚢 2026

𝙱𝙽𝙶𝚁𝙲 𝙰𝚟𝚊𝚛𝚊𝚝𝚛’𝙰𝚗𝚝𝚊𝚗𝚒𝚖𝚘𝚛𝚊

Manohy miara-miasa am-pirahalahiana sy am-pandraisana andraikitra feno ireo rafi-panjakana sy ireo mpiara-miombon’antoka rehetra, ho famaliana haingana sy mahomby ny filàn’ny mponina.

Notarihin-dRamatoa Maître Hanitra RAZAFIMANANTSOA Minisi-panjakana eo anivon’ny Fiadidiana ny Fanavaozana ny fivoriana, niarahana tamin’ny Minisitry ny Filaminam-bahoaka, Minisitry ny Fampandrosoana nomerika, ny Paositra ary ny Fifandraisan-davitra, Minisitry ny Mponina sy ny Firaisankina. Natrehin’ny Ben’ny Tanànan’Antananarivo Renivohitra, Lehiben’ny Faritra Analamanga mpisolo toerana, Lehiben’ny Prefektiora, Lehiben’ny Distrika Antananarivo I, II, III, IV, V, VI, ireo solombavambahoaka, ny BNGRC, ary ireo andrim-panjakana sy ireo rantsa-mangaika rehetra voakasik’izany.

Nifantoka tamin’ny fandaminana sy ny fanapahan-kevitra ary ny fitsinjarana andraikitra ny fivoriana, mba hanamafisana ny fandrindrana ny asa sy hisorohana ny fifanitsahana andraikitra, araka ny zava-misy sy ny filàna isaky ny distrika, manoloana ny voka-dratsin’ny fandalovan’ny rivo-doza FYTIA.

Nohamafisina manokana ny maha-zava-dehibe ny fitsinjovana ny maha-olona, ho fiarovana sy fanavotana ireo mpiray tanindrazana niharan-doza. Anisan’ny asa laharam-pahamehana nodinihina ny famatsiana sakafo, ny fampiasana motopompes, ny fametrahana ireo ekipa mpitsabo sy ekipa vonjy taitra, ary ny fandaminana ny fiarovana ny vahoaka sy ny fananany.

Nojerena ihany koa ny lafiny ara-pahasalamana, ka tafiditra ao anatin’izany ny fepetra sy ny fandaminana ho fiarovana ny mponina manoloana ny valan’aretina Mpox, sy ny fisorohana ny mety ho fiparitahan’izany.