𝐅𝐈𝐓𝐒𝐈𝐃𝐈𝐇𝐀𝐍’𝐍𝐘 𝐕𝐎𝐍𝐃𝐑𝐎𝐍𝐀 𝐀𝐅𝐑𝐈𝐊𝐀𝐍𝐈𝐍𝐀

Tonga nihaona tamin’ny Filohan’ny Fanavaozana ny Repoblikan’i Madagasikara teny amin’ny Lapam-panjakana Iavoloha androany, ny delegasiona avy amin’ny Vondrona Afrikanina notarihan’Andriamatoa Mahamoud Youssouf, Filohan’ny Vaomieran’ny Vondrona Afrikanina, ary natrehan’ny Minisitry ny Raharaham-bahiny Malagasy, Ramatoa Razanamahasoa Christine.

Nifampidinika ny roa tonta amin’ireo dingana mifandraika amin’ny famafàna ny fampiatoana an’i Madagasikara eo anivon’ny Vondrona Afrikanina taorian’ireny toe-draharaha niseho teto amin’ny firenena ireny.

Naneho fankasitrahana ny Filohan’ny Repoblikan’i Angola sady Filohan’ny Vondrona Afrikanina, Andriamatoa Joào Lourenço, ny Filoham-panjakana malagasy, Andriamatoa RANDRIANIRINA Michaël, noho ny finiavany hitady vahaolana manoloana ny toe-draharaham-pirenena ankehitriny.

Nambarany fa mahafantatra tsara ny fotokevitra ijoroan’ny Vondrona Afrikanina sy ny lalàna mahakasika ny demokrasia ao aminy i Madagasikara, ary nisaotra ihany koa ny delegasiona amin’ny finiavana hametraka fitoniana ara-politika sy ara-toe-karena hampandrosoana ny firenena.

Tsiahivina fa efa nisy ny fihaonan’ireo solontenan’ny Vondrona Afrikanina tamin’ireo Vondron-kery samihafa eto amin’ny firenena, hahafahana manampy amin’ny fanarenana ny rafitra sy ny fitondrana ary ny fampihavanana.

Mpikambana feno i Madagasikara, sady manana solontena maharitra eo anivon’ny Vaomieran’ny Vondrona Afrikanina (Commission de l’Union Africaine) any Addis Abeba, Ethiopie. Anisan’ireo firenena mpanorina ny OUA na Organisation de l’Unité Africaine rahateo isika ny taona 1963.