FIKAONANDOHA HO FANAVAOZANA NY ZANDARIMARIAM-PIRENENA.

 

🎯Tanjona ny hametrahana fanjakana tan-dalàna, hampanjakana ny fandriam-pahalemana, hiarovana ny vahoaka sy ny fananany.
Eo ihany koa ny famerenana indray ny fahatokisan’ny vahoaka.
🗣️ Nanome voninahitra ny fotoana ary nandray anjara fitenenana ny Filohan’ny Fanavaozana ny Repoblikan’i Madagasikara, ny Kolonely Michaël Randrianirina . Hoy izy nandritra ny lahateniny :
👉Tolokevitra matotra ahafahana mitondra fiovana mivaingana eo anivon’ny zandarimariam-pirenena no andrasana : mametraka ny hasin’ny fanjakana, ny ady amin’ny kolikoly sy gaboraraka samihafa
👉Ny miaramila sy ny zandary dia tokony hanaraka ny rafitra miaramila sy ny lalàna miaramila
👉Nisy ny nihoa-pefy nandritra ny hetsi-bahoaka tamin’ny taona 2025 ary handraisana fepetra satria nanaratsy endrika ny zandary fa tsy ny zandary rehetra akory no ratsy
‼️ Tokony hanakaiky hatrany ny vahoaka ny zandarimariam-pirenena , hampiseho ny mangarahara, hanome tamberin’andraikitra, hanaja ny soatoavina mahamalagasy.
👥 Anisan’ireo nanatrika ny fotoam-panokafana ity Fikaonandoha ity ny Minisi-panjakana eo anivon’ny Fiadidiana ny Fanavaozana, Me Hanitra Razafimanantsoa.
✅Tafiditra indrindra ao anatin’ny fikaonandoha isan-tsehatra ity fihaonana androany ity. Niainga tamin’ny fakan-kevitra isan-tokony nandraisan’ny zandary rehetra anjara ary heverina hitondra fanovana lalina sy maharitra hanorenana indray ny firenena malagasy.
✅Lohahevitra 8 no dinihina mandritra ny tontolo andro toy ny
👉fanatsarana ny lafiny mahaolona
👉ny famolavolana paikady amin’ny serasera,
👉 ny fanavaozana ireo didim-panjakana mifehy ny zandarimariam-pirenena izay tsy mbola niova hatramin’ny taona 1960,
👉ny fandrindrana ny rafi-pibaikoana mba ho tonga malaky ny zandary rehefa mila azy ny vahoaka,sns.
✅Handray anjara anaty vaomiera ny solontenan’ny tanora, ny solontenan’ny firaisamonim-pirenena, ny solontenan’ireo jeneraly efa misotro ronono ary ny mpanao gazety.
✅Tonga nanatrika ity fotoana ity ny Mpanolotsaina Avo efatra mirahalahy, ny Filohan’ny antenimeran-doholona mpisolo toerana,ny mpikambana ao amin’ny governemanta sy solombavahoaka sasantsatsany ary ireo Manamboninahitra ambony eo anivon’ny zandarimaria sy ny tafika.