Tamin’ny 03 ora tolak’andro teo, dia tany amin’ny 162 km andrefan’Itampolo / Ampanihy no nisy ny foiben’ilay rivodoza GEZANI. Nihena hatrany ny heriny. 80 km/ora ny rivotra miaraka aminy, izay arahina tafiotra 110 km/ora manakaiky ny foibeny. Nikisaka niatsinanana izy ka nahafaka 11 km/ora.

Tombanana hanakaiky kokoa ny morontsiraky ny distrikan’Ampanihy Andrefana izy anio alina, mialoha ny hanalavirany tanteraka ny morontsiraka. Ahiana araka izany ny mety hahavoakasiky ny rivotra mafy (manodidina ny 65 km/ora) ny morontsiraka atsimo sy atsimo andrefana iny.

Noho izany dia miova toy izao ny filazana loza :

Loza mitatao miloko mena : Ampanihy Andrefana sy Beloha ;

Loza manambana miloko mavo :Tsihombe.

Tsy dia ahiana kosa ny rotsak’orana mety ho aterany satria saika any an-dranomasina no hivangongo kokoa ny rahom-baratra entiny.

Iangaviana ny mpampiasa ranomasina eo anelanelan’i Maintirano hatrany Taolagnaro mba tsy hiandriaka intsony, satria mikorontana ny toetry ny ranomasina. Entanina ny rehetra mba hanaraka hatrany ny toro-marika omen’ny manam-pahefana isan-tokony.

Météo Madagascar

Ministère des Transports et de la Météorologie de Madagascar