Nidina teny amin’ny JIRAMA Antanetibe androany maraina ny Filohan’ny Fanavaozana ny Repoblika, Michaël RANDRIANIRINA, niaraka tamin’ny Praiminisitra, Herintsalama RAJAONARIVELO, nanatitra vata mpanova herinaratra miisa 28 ho an’ny JIRAMA. Mitentina 5 miliara ariary ny vidin’ireo fitaovana ireo, izay marihina fa mpandraharaha eto Madagasikara no nanome azy, hoy izy.

Natao malaky izany, hoy ny Filoha Michaël RANDRIANIRINA, mba hamaliana ny fitarainan’ny vahoaka, izay tratran’ny fahatapahan-jiro tanteraka (black out).

Miara-miaina amin’ny vahoaka malagasy ireny fanapahan-jiro mifandimby ireny aho, hoy ny Filoham-panjakana, tamin’ny tomponandraikitry ny JIRAMA.

Nanome toromarika manokana izy, ny hijerena haingana ny faritr’Ihosy izay nividianana vondrona mpihary herinaratra, ary mangataka fiaraha-miasa amin’ny JIRAMA ny amin’ny fitaterana izany malaky.

Nomarihin’ny Filohan’ny Fanavaozana ny Repoblika koa fa tokony hiasa fa tsy miandry fitokanana ireo tobin-drano roa ao Morondava. Tsy ny jiro ihany, hoy izy, no mampikaikaika fa ny rano koa. Nilaza moa ny tale jeneralin’ny JIRAMA, Ron Weiss, fa efa vonona hanolotra ny drafitra fanarenana ny jiro sy rano ny eo anivon’ny JIRAMA.

Ny Praiminisitra Herintsalama RAJAONARIVELO dia nanamafy fa mila mihetsika haingana ny eo anivon’ny JIRAMA. Inona no hatao, hoy izy, ary inona no tonga dia azo hirosoana?