Madiva hifarana ny iraka nataon’i Alice Nzomukunda solontenan’ny Vondrona afrikanina teto Madagasikara. Ka alohan’ny handaozany an’i Madagasikara dia nitsidika nanao veloma ny Minisi-panjakana eo anivon’ny Fiadidiana ny Fanavaozana ny Repoblika, Maître Hanitra Razafimanantsoa tao amin’ny birao fiasany Antaninarenina ny tenany.

Tanaty fifanajana tanteraka ny dinika. Samy nahatsapa ny roa tonta fa nisy niezaka avy amin’ny tsirairay ka nampahomby ny iraka natao.

Nanolotra fankasitrahana manokana ho an-dRamatoa Minisi-panjakana izy noho ny herim-po sy fahasahiana nasehony tamin’ny fanatanterahana ny asa sy dingana rehetra atao ho amin’ny fanavaozana ny Repoblika. Notsipihiny ihany koa fa tena misy ny finiavany hametraka fampandrosoana maharitra sy Lovainjafy.

Na dia teo aza ny fandalovan’ny rivodoza Fytia sy Gezani, dia nambaran’ity solontenan’ny Vondrona Afrikana ity fa nasehon-dRamatoa Minisi-panjakana ny faharetany sy ny fahavononany hiroso hatrany, ary nitohy hatrany ny dingana hanatanterahana ny fikaonandoham-pirenena sy ny fifanakalozana am-pilaminana.

Noderainy manokana ihany koa ny finiavan’ny Minisi-panjakana hanamorana ny fandraisan’anjaran’ny rehetra amin’ny Fikaonandoham-pirenena , mba hahazoana antoka fa tena mandray anjara tokoa ny sokajin’olona rehetra ao anatin’ny fanavaozana.

Nilaza ihany koa Ramatoa Alice Nzomukunda fa nasehon’ireo mpitondra malagasy ny finiavana ara-politika hentitra hampahomby ny dinika, izay mitondra mankany amin’ny fiverenana indray eo anivon’ny Vondrona Afrikana.

Naneho firariantsoa ho amin’ny fahombiazana tanteraka amin’ny fanohizana ny dingana hatrany izy.

Etsy an-kilany dia nisaotra manokana an-dRamatoa Alice Nzomukunda ny Minisi-panjakana, Maître Hanitra Razafimanantsoa, satria nandray anjara biriky lehibe ihany koa amin’ny dingana hamerenana indray an’fitantananai Madagasikara eo anivon’ny Vondrona Afrikana.

Nambarany fa nandritra ny fotoam-piasany teto dia noraisin’ity solontenan’ny Vondrona Afrikanina ho toy ny tanindrazany tokoa i Madagasikara, ka nasehony tamin’izany ny fitiavany sy ny fahavononany hanohana ny firenena.

#fifanajana #fiaraha-mientana #finiavana

#mepcr#fikaonandohampirenena #fanavaozana