Mankasitraka ny Filohan’ny Fanavaozana ny Repoblika nanendry sy nametraka ny fahatokisany tamiko hitantana ny Minisiteram-panjakana misahana ny Fanavaozana. Misaotra indrindra tamin’ny fiaraha-miasa feno finiavana sy fahavitrihina teo aminao sy ireo Mpanolotsaina Avo ary ny tenako miaraka amin’ireo mpiara-miasa rehetra.

Mankasitraka ny Praiministra ihany koa nanolotra ny anarako teo amin’ny toerako ary nanome fahatokisana tamin’ny asa nataoko. Misaotra tamin’ny fitarihina sy ny traikefa nozarainao.

Ry rahavavy sy anadahy rehetra, isaorana ny Tompo nampiray antsika rehetra tao anatin’iny Governemanta iny, misaotra tamin’ny fiaraha-miasa sy firahalahiana ary fiaraha-mientana nandritra izay efa-bolana izay. Pejy iray mivalona iny. Traikefa miabo vaovao. Samy niezaka nanao izay vita isika. Misy koa no mbola tsy vita na andalam-pahavitana.

Ho ahy manokana dia traikefa lehibe ilay sady nanorina ny Minisitera, nametraka ny fototra no niasa avy hatrany; na tsy mbola nanana tetibola aza. Nahazoako porofo azo tsapain-tanana fa azo atao tsara ny miroso, tsy miandriandry, anaty finiavana.

Mankasitraka ny Mpiara-miasa rehetra niara-nientana tamim-pifanajana sy am-piniavana.

Teo koa ireo Mpiara-miasa teo anivon’ny Fiadidiana ny Fanavaozana ny Repoblika, ny teo amin’ny Primatiora ary ireo Minisitera sy Rafim-panjakana maro.

Ankasitrahako manokana ireo:

– Tanora GenZ, ny fiarahamonim-pirenena maro, ny FFKM sy ny Mpino samihafa, Fikambanam-behivavy sy Fikambanana samihafa, Antoko sy mpanao politika, olom-pirenena tsotra, mpahay raha, ireo Raiamandreny ara-drazana, ny Diaspora sy ireo izay tsy voatanisa.

– Ny fikambanana iraisam-pirenena : Système des Nations-Unies, PNUD, Union Européenne, Union Africaine, SADC, OIF, EISA, Ambassade de Chine sns…

– Ary ny farany nefa tsy kely indrindra dia ny Malagasy rehetra miandrandra Fanavaozana tokoa.

Mankadiry sy midadasika izany fa miainga avy amintsika tsirairay avy.

Ny Fitiavako ny Taninjanaka sy ny hananan’ny Malagasy sy Madagasikara toerana mendrika no ady nataoko sy mbola hataoko na inona na inona andraikitra omena ahy.

Me Hanitra Razafimanantsoa